Dynnargh – Nowodhow

English

Ni a'th helow hwithra agan le. Omma y hyllydh dyski a-dro dhe istori ha devedhyansow an Orsedh, porpos ha styr an solempnitys, agan kesstrivyansow bledhenyek, hwarvosow,agan kevrennow dres an bys ha'gan le y’n bys Kernewek kevos. An le nowythhes prest dhe synsi ynno an nowodhow nowyth.

Rag treylyans Sowsnek a neb folen, gwra klyckya mar pleg war an baner. Rag treylyans Sowsnek a neb folen, gwra klyckya mar pleg war an baner.

Y hwrug devnydh Gorsedh Kernow a’n lytherenans Kernewek Unys rag hy negys oll bys ha'n Kuntelles Kemyn Bledhenyek mis Metheven 2009 may hwrug hi degemeres an Furv Savonek Skrifys (FSS). Yma pub erthygel oll keworrys wosa an jydh ma y’n lytherenans nowyth.

Esedhvos Kenedhlek 2012

Bardh Meur ha Christine James (Arghderwydh Dewisys) ha Bardh Meur (Dewisys)

An Esedhvos Kenedhlek, gool bryntin an yeth Kembrek del yw, bos synses an vledhen ma dhe Bontvaen, Morganog yn Kembra Dhyhow. Kanasow a dhiworth Kernow, Breten Vihan, Alban, Iwerdhon hag Enys Manow a veu kuntellys warbarth avel gwestyoryon Gorsedh Berth Enys Breten rag an Esedhvos ma dres peswar dydh. Rag Kernow Skogynn Pryv ha Steren Mor a junyas an Geltyon erel war Ves an Esedhvos yn un keslowena a'n Taves Kembrek hag y'n kylgh hag yn nebes solempnita an Orsedh hag ynwedh yn lies fordh aral an gonisogedh kembrek hag agan gwreyth Keltek rennys.

Yth esa Iain Moireasdan ha Seamus Greumach dhiworth Alban, Pig an Eienn ha Loargann ar Galon dhiworth Breten Vihan. Cinzia Yates esa an gannas Manowek hag yth esa Maire O' Laoire hag Eileen Barry a dhiworth Iwerdhon. Yn drist, hevlyna ny dheuth nagonan a dhiworth Gorsedh an Wlasva yn Patagoni. An nessa dydh, Maire, an Gannas Iwerdhonek a wrug an areth abarth an Geltyon oll yn y Gwydhalek freth y honan, hag ynwedh, yn frav a assayas nebes lavorow Kembrek a veu degemmerys yn ta gans an gleworyon esa y'n pavilion rag Kurunyans an Bardh. Ny veu res hevlyna an Medal rag lien yn yeth plen. Ni a dhegemmeras li brav gans an Arghderwydh Jim Parc Nest a’dan skoodhyas del usadow.. Dyskys on ni Christine James a vydh an venyn an kynsa dhe dhos ha bos Arghderwydh Kembra yn unn sywya del leveris Jim Parc Nest agan ensample Kernewek. Avel pupprys yth esa Mererid Hopwood owth agan gwaytya yn hi maner mas hy dres ehen. Y’n vledhen ma an Esedhvos re synsis y’n kettermyn es an Olympyad hag yn ranndir may feu an brassa rann an bobel Sowsnegoryon hag yn dydhyow kales. An Esedhvos yw hwath gool marthus da an Taves Kembrek ha gans moy es 15,000 ow tos pub dydh ha heb klewes lies ger a Sowsnek joy o ragon dhe vos dhe Bontvaen.

Arghderwydh

Dydh Kovadh Kernewek, Pennrynn

Tamm wosa 12.30 Dy’Sadorn an 25ns a vis Est – Gool Pennrynn – an solempnitys a wra ygeri gans an Gonis a Govadh bledhennek y hys 15 mynysen, orth an Men Kov war an Lasen ryb an golowys daromres Fordh Kenwerthek.

An gonis ma a borth kov a’n lies Kernow neb, dres an kansbledhynnyow, re ros aga bewnans rag aga Mammvro. Tus a vri dinasek a vydh omjunys gans kannasow an Luyow Ervys, Berdh Kernow hag eseli an poblek kemmyn. Pub huni yw wolkum.

"Gernowyon o yn-mysk an kynsa trevesigyon yn Wisconsin Soth-West, SU, y’n bledhynnyow 1830, le may tevnydhsons aga sleyneth dhe estenna plomm dhyworth an powdir y’ga herhyn.

Der an kansbledhen eus passys yth o possybyl dadhla bos moy a dus a dhevedhyans Kernewek trigys y’n ranndir ma es agh aral. Hwath poblys yn poos gans an teyluyow Rule ha Jewell, an dus a Mineral Point yw orgelus a’ga ertach, yn kres an pyth eus ‘Pendarvis’. an ‘Gundry Mansion’ ha’n Lyverva vras-oberys. Orth kolon dasnowythheans a-dhiwedhes an lyverva ma, yma gravyans bas-relief a lymner leel Bruce Howdle, hag a dhiskwedh an ‘Kernow Vyhan dres an Morow’ ma."

Kepar del via desevys, yma niver a Verdh Kernow y’n ranndir, y’ga mysk Catherine Whitford, neb a vydh gwrys Bardhes dhe Reskammel Kala Gwynngala.

Catherine a skrifas an geryow ma dhe dheskrifa ober Howdle (mires orth furvlen PDF).

Rag manylyon Piwasow Konsel an Orsedh Kernow 2012 mar pleg klyckyewgh omma.

Rag Sewena Kesstrivyansow 2012 mar pleg klyckyewgh omma.

Rag Rol a Verdh Nowyth dhe'n Orsedh Reskammel, klyckyewgh omma mar pleg.

Bardh Meur ha Kannas Bardh Meur

Orth kynsa kuntellyans Konsel nowyth an Orsedh, Maureen Fuller – Steren Mor, an Gannas Bardh Meur a-lemmyn, a veu etholys avel an nessa Bardh Meur Gorsedh Kernow 2012-2015. Maureen a entras an Orsedh avel Bardhes an Taves yn 1977. Hi Hannas a vydh Merv Davey – Telynor an Weryn neb dres lies bledhen re beu Piber an Orsedh. Merv a dhegemeras Bardhieth yn 1978. Y fedhons i stallys yn sodhogel yn soodh dhe benn Solempnita an Orsedh orth Reskammel Kala Gwynngala.

Y fydh Maureen ynstallys avel Bardh Meur Kernow Kala Gwynngala 2012 dhe Reskammel y’n Uheldiryow yn-dann skeus Roughtor. Hi a wra pesya yn soodh dres 3 bledhen. Yma hi ow kwaytya vysytya an Gernowyon tramor, kyns oll yn Awstrali may trevesigis nebes a’y theylu y’n 19ves kansbledhen. Mall yw gensi gweles aga henath ha synsi Gorsedh rag an Verdh yn Awstrali, neb a vydh ow solempnya 40ves Pennbloodh aga Huntelles Kernewek ‘Lowender Kernewek’, ha 20ves Pennbloodh an kynsa kuntelles bardhek y’n vledhen a dheu.

Gorsedh Bretonek 2012

Yth esa pennseythen ha hir ha leun dres ehen rag Skogynn Pryv ha Steren Mor pan esens i yn Breten Vyhan avel kanasow dhe’n Orsedh Vretonek.

Wosa treusi an Ganel a dhiworth Aberplym bys yn Rosko myttin Sadorn y hrussens i viajya dhe Gemperle hag ena attendya solempnita berr, yn korflan an dre, restrys gans pobel an dre rag enori tri den a vri a drigsa ena hag a veu ynkleudhyes y’n gorflan na. An kynsa anedha esa an Isyurl Hersant de Villemarque (KERVARKER) a skrifas Barzhas Breizh (Bardhas Breten Vyghan) an lyver an moyha dhe les y’n wonisogeth Bretonek. Matalin an Dall, an nessa y’ga mysk esa an piber a vri hag a guntellas meur a donyow an ilow Bretonek hag an tressa esa Dr Cottonoc, leuvvedhek meurgerys a restras yn y furv arnowyth rewlys Omdowl Bretonek hag esa ynwedh den poosek yn istori agan Omdowl Kernewek.

Dres an solempnita na glaw a wrug yn krev mes awosa an howl a wre splanna y’n ebron. Ena i a wrug vysytya Manorji Kerault ple wrussens i metya orth an Isyurles Kervarker ha studhya an lyvrow y’n lyverva Kervarker. Wosa kynyewel dhe Bont Aven yth esa dyskwethyans bryntin tanweyth adro dhe hanternos heb glaw vydh.

Wosa Hansel Dy’Sul Bardh Meur ha Kannas Bardh Meur eth gans an Vretonyon dhe Arzhanou yn dann an howl lagas an jydh rag solempnita an Orsedh. An solempnita na haval yw an huni Kernewek mes leha yw rag nyns yw niver bras eseli anedhi. Druidh Meur , Morgan, a wrug areth yn kever govenek an Vretonyon adro dhe’n Kadoryer Nowydh Pow Frynk hag yn arbennik avonsyans aga thaves i. An solemnita gorfennys, nebes berdh a wrug dri uhelvarr rag pubonan a ylli eva medh a dhiworth korn bras. Dohajydhweyth neb kans den ha benyn a wrug kesranna kinyewel kolonnek warbarth. Delusadow helder an Vretonyon a bassyas pub gwaytyans oll.

Gorthuherweyth, yn boosti arall, an ganasow Kernow ha Kembra a dhadhlas adro dhe daklow ha kemmyn ha tykkli y’n bys an Gorsedhow.

Dy Lun, yth esa Yeth an Werin gans Bretonyon ow kewsel Kernewek yn freth. Ass o henna marth.

Meur ras arta dhe’n Vretonyon a’ga huvder y’gan dhegemerans brav.

Yma edhom dhe Orsedh Kernow a dhew vodhek mar pleg. Kynsa, yma edhom a nebonan dhe dhos ha bos PR/ Sodhak an Gwask rag agan kowethyans. Nessa, yma edhom dhyn a gesordenor rag stalla an Orsedh orth an Displetyans Kernow Riel.

Mar kyllowgh hwi ri gweres gans an eyl po y gila a’n dhew a-ugh, po a garsa kavos manylyon pella, kestavewgh mar pleg

An kost yw £6 ha ganso £1.20 f & l y’n RU, £3 f & l Europa, ha £4 rag remenant an bys. Yth yw furvyans PAL Europek war blasen pryntys yn liw DVD-R. Y teu yn kyst lyverva DVD gans brehel pryntys yn liw. Furvlen arhadow omma (furvlen PDF)

Piwasow Holyer an Gof 2012 (rag Lyvrow dyllys yn 2011)

Yth esa an Bardh Meur Mr Mick Paynter/Skogynn Pryv a-gynsow orth an gorthuher rians bledhennek rag an oberow lyenek ma hag a veu ordenys gans Gorsedh Kernow yn kov a dhyller Resrudh Leonard Truran – Holyer an Gof.

Gwaynyer an piwas dres oll meur an Gwerison o "Falmouth Frameworks" by Brian Stewart, Paul Mitchell & Lynn Roberts - Dyller: Sansom & Company Ltd., Soler Art Aberfala

Gwaynyoryon erel o:
Souvenir Press. "Held by the Sea". Jane Darke
Evertype. "An Beybel Sans : The Holy Bible". Translation : Nicholas Williams
Palores Publications. "Poetry Cornwall/Bardhonyeth Kernow 2002-2012". Les Merton
Charles Thurlow
Dew Vardh. "Trurra". Bert Biscoe
Atlantic Press Ltd. "Howl on the Wind". Charmian Hussey
Kowethas an Yeth Kernewek. "Karol Nadelik (A Christmas Carol)". Translation : Steve Harris
Bears on Location Books. "The Bears of Porthors Go Tin Mining". Dale Reardon
Orion Children's Books. "Adventure Island - The Mystery of the Whistling Caves". Helen Moss
Scryfa. "Solid". Simon Parker
Federation of Old Cornwall Societies. "Good Fellowship of Padstow". Barry Kinsmen
David & Jan Penprase. "Harbour to Harbour". David & Jan Penprase
Francis Boutle Publishers. "Funding the Ladder. The Passmore Edwards Legacy". Dean Evans
Federation of Old Cornwall Societies. "Carols of the Stratton Hundred, North Cornwall". Bude Stratton Old Cornwall Society

Rag manylyon leun mires orth www.holyerangofawards.org.uk

Gorsedh Kernow: An Orsedh Kernow 1928-2012

Y hwyrvydh dhe Reskammel, Dy’Sadorn Kala Gwynngala 2012, kuntellyans an Berdh Kernow. Drefen hevlyna dhe verkya penn an termyn soodh a deyr bledhen an Bardh Meur a-lemmyn, Skogynn Pryv, ha’y Gannas,Steren Mor, Bardh Meur ha Kannas Bardh Meur nowyth a vydh ynstallys orth an solempnita.

Attendyans poblek yw heb kost hag yw dynerghys.

Y hyllir gweles manylyon an solempnita ha darvosow skoodhya omma.

Solempnita an Awen

Yn presyow Keltek eus passys, kuntellyansow a veu synsys yn kompes orth leow posek dres Breten Veur, gans onan anedha an kylgh koth a veyn Boskawen Oon, yn Pluw Eglosberian, war an hallow uhel a Gernow West. Yth yw prederys bos an kylgh a veyn dhe dhedhya a-dro dhe 2000 KK, kyns an Geltyon dhe drevesiga yn Breten Veur.

Dydh Golowan, Berdh Gorsedh Kernow a dhehwelis dhe Voskawen Oon rag Solempnita an Awen. Yth esa an kylgh ma a 19 men growan gans men kresel usi ow posa dhe unn tu, le an kynsa Gorsedh yn 1928, ha kynsa Solempnita an Awen warlena.

Y hyllir gweles fylm Solempnita an Awen omma.

Derivas Berrhes KKB an Orsedh Kernow

Sommen a 47 Bardh eth dhe’n KKB hag a veu synsys yn Chambour an Konsel, Lys Kernow, Dy’Sadorn an 16ves mis Metheven 2012. 23 Bardh a dhanvonnas aga diharesow.

Bardh Meur a wodhva grassow meur dhe eseli an kyns Konsel a’ga ober dres an diwettha teyr bledhen hag a ros y areth may poslevas ev an edhom usi ow pesya rag lystyans a dus yowynka, ha linenna treylyansow a-gynsow y’n argerth rag profya berdh nowyth. Ynwedh ev a veu kenerthys gans tevyans usi ow pesya a dhelanwes an Orsedh hag ynkressyans yn solempnyansow a-dro dhe Wool Peran. Ev a worfennas dre gampolla styr a dhispletyans a’gan baner kenedhlek war an galli riel Gloriana, mayth esa trenijys avel onan an kenedhlow Breten Veur, ha’gan kovhe bos hwath lies dh’y wul, ytho y kodh dhyn ni mos yn-rag ha’y wul.

Derivadow a veu res gans an is-kessedhegow divers ha degemerys. Derivas an Alhwedhor dhyworth David Lindo Carer Lowarthowa veu sywyys gans trubyt dhodho dhyworth Carl Roberts Whyler Ertach Sen Ostell, awos y vos lemmyn omdennys. An Alhwedhor nowyth, Jerry Rogers Mab Eglosvelyon, a veu komendys ha degemerys gans an Verdh kuntellys.

Cum Morek a dherivas y fydh 15 person gelwys dhe dhos ha bos berdh hevlyna. Synsys y’ga mysk y fydh 8 dre gwalifians y’n taves Kernewek, ha 2 dhyworth Ostrali hag onan dhyworth an Statys Unys.

Yn unn holya an raglev synsys a-varra hevlyna, an sywyans a veu lennys gans An Skrifenyades. Konsel an Orsedh Kernow a wra synsi ynno an eseli a syw: Terry Bale, Russell Bennett, Bert Biscoe, Wella Brown, Eileen Carter, Marion Coombe, Howard Curnow, Merv Davey, Susan Davey, Peter Harvey, Terry Knight, Mike Millard, Pat Miller, Vanessa Moyle, Maureen Pierce, Alastair Quinnell, Phil Rendle, Colin Roberts, Barbara Shaw ha Keith Shaw, dres an Bardh Meur, Kannas Bardh Meur, kyns Berdh Veur, Alhwedhor ha Skrifenyades.

An avis a syw a veu degemerys:
Ewnans dhe Rewl 6a hag a-lemmyn a lever:
"a) An Bardh Meur, Kannas Bardh Meur, Skrifennyas hag Alhwedhor ( alemma rag henwys ‘an Sodhogyon’)"
a vydh ewnys dhe leverel:
"a) An Bardh Meur ha Kannas Bardh Meur, an dhew anedha a vydh kwalifiys der aga frethter y’n taves Kernewek, Skrifennyas hag Alhwedhor ( alemma rag henwys ‘an Sodhogyon’)".

An avis a syw a veu degemerys:
"Y hwra Gorsedh Kernow dos ha bos esel an Kowethas Amethek Kernow Riel."

An avis a syw a veu degemerys:
"Y hwra an KKB ma govyn orth Konsel an Orsedh dhe dhasweles argerdhow a dhewisyans an Bardh Meur ha Kannas Bardh Meur ha dhe ri derivas gans komendyansow dhe’n KKB 2013."

An kuntellyans a veu deges hag a veu holys gans Gwesper y’n Soler Hir, ledys gans Chaplen dhe’n Orsedh, Rev. Jane Kneebone Colom Wyn.

May hyllir kovhe Gorsedh 2012, usi ow hwarvos dhe Reskammel, Gorsedh Kernow re worras war-barth dyllans hag a re manylyon bewnansow hag oberow a hwegh ha dew-ugans Bardh marow neb esa trigys hag oberi, dhe’n lyha rag rann aga bewnans, yn Ranndir Kernow Gledh. Yma ynwedh manylyon a hwegh war’n ugens Bardh byw ha’n ober esons i ow kul rag Kernow y’n eur ma. Hemm yw an tressa yn kevres towlys a dhyllansow a-dro dhe’n ranndir mayth yw synsys an Orsedh.

Dhe gavos manylyon pella ha fatel yllir erhi dasskrif, mar pleg klyckewgh omma.

Lyver-Dedhyow ha Kartennow Nadelik rag 2013

Lyver-Dedhyow, 13 mis, Kernewek, a nas uhel gans dedhyow a dharvosow Kernewek bledhennek posek, golyow ha solempnyansow, y’ga mysk gwriansow ha dedhyow Gorsedh Kernow, yw kevadow dhe Verdh.

Yma’n kartennow Nadelik yn fardellow a 5 gwel Kernewek kemyskys, gans dynnargh an seson y’n taves Kernewek.

Ynwedh kevadow yw dewis a 5 karten-notyans kemmyn kemyskys gans dynnargh yn Kernewek, desinys ha pryntys yn Kernow rag Gorsedh Kernow.

Furvlen arhadow omma.

Teylu, kowetha ha Berdh eth dhe gevewi arbennek rag Marjorie Trevanion synsys dhe solempnia hy 100ves penn bloodh. Marjorie re brofyas yn kompes dhe Gesstrifow an Orsedh hag yn 2008 a waynyas an kynsa piwas y’n klass rag gwers Kernewek. Gwedhwes a kyns Bardh Meur Dennis Trevanion – Trevanion - Marjorie a veu gwrys Bardhes yn 1981, dhe Nans, Egloshal. Kannas Bardh Meur Maureen Fuller – Steren Mor - a ros dhedhi testskrif arbennek dhyworth Gorsedh Kernow, yn unn verkya an 100ves penn bloodh a Rosen Wyn Evrok, White Rose of York.

Derivas Berrskrifys Kuntellyans Konsel an Orsedh mis Ebrel 2012

Kannas Bardh Meur a ros nowedhians a-dro dhe’n Orsedh Ygor dhe Reskammel, towlow an pyth usi owth avonsya yn ta gans omvyskans leel ha gans argemynnans pur bosethek.

Y feu Gool Peran dadhlys. Moy a drevow re dhalathas keskerdhow ha hemma a re kennerth. Y fydh derivas dhyworth an Bardh Meur res dhe’n gwask dhe genertha awtoritys leel dhe restra darvosow rag an dedhyow bys yn Gool Peran y’n vledhen a dheu dres gelwel orth Berdh dhe omjunya yn darvosow y’ga thyleryow aga honan.

Y feu derivadow res gans iskessedhegow ha degemerys, gans termyn meur res dhe dreylyansow profys dhe’n fordh may fo berdh degemerys. Hemma a vydh dadhlys pella.

Yma kessedhek nowyth yn le lemmyn dhe venystra Kesstrifyansow an Orsedh.

Hevlena a wra gweles etholans a Gonsel nowyth – hemma a hwer pub teyr bledhen – hag yma hemma pell war an fordh gans an sywyansow derivys orth KKB hevlena mis Metheven.

Gwarnyans an Orsedh dhe Reskammel 2012

Spit dhe gewer gemyskys an dedhyow kyns, an myttin o howlek, kynth o yeyn. Gans baner esa ow tynerhi an Orsedh dhe Reskammel yn unn gregi a-dreus dhe’n stret, an keskerdh a a-dro dhe 60 Berdh, ledys gans an piber, Merv Davey – Telynor an Weryn, a wias y fordh der an dre dhe Bark Enfield, may talathas an solempnita gans dynnargh yn Kernewek gans an Mer.

Yn unn worthebi, an Bardh Meur a wodhvos gras dhodho ha dhe’n dus Reskammel a’ga helder, ha ri dhe’n dre tamm framys a lyen yn Kernewek gans Tim Saunders – Bardh Gwerin.

Wosa an solempnita berr ha’n derivas y hwrussa an solempnita meur, an Orsedh Ygor, hwarvos y’n dre Dy’Sadorn Kala Gwynngala, an keskerdh a dhehwelis dhe’n Eglos Vedhodek rag sosten.

Nowodhow dhyworth Berdh an Orsedh Kernow yn Ostrali

Eaglehawk (Bendigo) yw an kyns tre valieth owr yn Vyktoria, Ostrali, le mayth omguntellas mis Meurth, Berdh yw trigys yn Ostrali, rag aga Huntellyans Bardhek ha dhe avonsya yn stout aga Ertach Kernewek.

Routh meur a omguntellas dhe vires orth an solempnita ha dhe blesour an re na yndella kuntellys, an vowesi hag a dhonsyas y’n solempnita o kamm-perfeydh.

Synsys y’n skeusen gans an Verdh ha Degoryon Banerow yw an Mer, Klr. Rod Fyffe, Kyns Vyktoryanes an vledhen Lola Miller, ha Lewydh an Citys Hwoer (Bendigo ha Pennsans), Peter Mundy. An skeusenner o Esel CAV Arthur Coates.

Dre vysyt a-gynsow dhe Ostrali Soth, skrifennya eseleth an Orsedh David Holman – Rifelwas, a omvetyas gans Berdh an Konnatir Yorke. Terry Johnson - Den a Bol, ha Noel Carthew - Map Caddy, a lewyas an 100 mildir po a-dro dhodho dhyworth Adelaide dhe Moonta dhe omjumya gans an Verdh erel rag prys li.

A’n kledh dhe’n dyhow: David Holman (Rifelwas), Ros Paterson (Roslyn an Dyghow), Noel Carthew (Map Caddy), Terry Johnson (Den a Bol), Beth Vayne (Awhesyth Byasen), Liz Coole (Myrgh Moonta), Lilian James (Ula Ruthvelen), Paul Thomas (Map Wallaroo).

Dr Kaspar Stephen Hocking - Car Broghas

Solempnyans an bewnans Kaspar a veu synsys a-gynsow pan dheuth warbarth teylu, kowetha ha kowethysi dh’y berthi yn kov ha kevranna aga hovyon wosa y vernans mis Hwevrer gans bloodh a 99.

Kaspar Hocking a veu genys mis Genver 1913. Ev a studhyas bewonieth orth Kolji Emperourethek Loundres hag oberi dres 30 bledhen avel entomologydh in Afrika Est (Tanganyika, Uganda, and Kenya), kyns omdenna dhe Bolhweveral, Lanngostentin yn 1967. Yn herwydh y vyrgh yowynka Vanessa Beeman, ev eth dhe glass Kernewek Hilary Shaw dhe Bennrynn, an dhew ow tos ha bos Berdh Gorsedh Kernow yn 1993, hag ev 80 bloodh. Ev o kaderyer Agan Tavas a-dhia 1996 dhe 1998, hag yn 2009 y dreylyans yn Kernewek a ‘A-dro dhe’n Bys yn 80 Dydh’ a veu dyllys. Gans passhyon meur rag godhvewnans yth esa ev hwath owth attendya kuntellyansow an Trest Godhvewnans Kernow, le may fia y Gaderyer ha’y Lewydh. Ev a wari yn kompes gwydhbol, yn unn synsi an klub gwydhbol Lanngostentin dres 6 bledhen, hag a omjersya morviaja. Ev o gothus ynwedh pan dheuth ha bos Vanessa Bardh Meur yn 2006 hag arta pan veu y vyrgh aral Shelagh Garrard gwrys Bardhes yn 2010. My a wra pub prys perthi yn kov ‘K’ avel koweth kuv, kosel, den a dhynita neb o mar dhe les dhe gewsel ganso, ha neb a vydh kellys kemmys gans kemmys a dus.

Pat Miller - Myrgh Jowna
Menystrores an Wiasva

Gwarnyans an Orsedh 2012

Y fydh synsys Gwarnyans an Orsedh an 21a mis Ebrel 2012 dhe Reskammel. Berdh a yll gwiska y’n Eglos Vethodek y’n stret meur dhyworth 10 eur an myttin.

Tyller an Gwarnyans yw Enfield Park, hag yma’n entrans y’n stret meur ryb an pons.

Y hwra dalleth an Solempnita dhe 11 eur.

Y fydh keskerdh berr dhe dhehweles dhe’n Eglos Vethodek rag sosten.

Kesstrivyansow an Orsedh Kernow 2012

A yllyn ni kovhe pub huni y fydh dydh degeans rag an kesstrivyansow 2012 Dy’Meurth 17ves a vis Ebrel.

Rag manylyon leun omma rag tevesigyon , hag omma rag tus yowynk.

Y hyllys gweles an baner arbennek Peran dres Kernow oll ha tramor ha kemyniethow Kernewek ow tos warbarth dhe solempnya gool aga thassans. Niver a dharvosow a bes ynkressya pub bledhen gans moy a drevow, gwigow ha skolyow ow tos ha bos omvyskys. Onan an drevow hag a gemeras rann gans hy hynsa keskerdh gool Peran ha kesstrif fenester-gwerthji o Aberfala.

Porth Peran / Aberfala / Porth Peran

Truru

Truru / Bosvenegh

Rysrudh

Aberfala

Derivas Berrhes Kuntellyans Konsel an Orsedh mis Hwevrer 2012

Tri Esel an Konsel warn ugens eth dhe’n kuntellyans hag a veu synsys yn Chi an Grenoryon dhe Druru.

Unnweyth arta, poslek krev a veu gorrys war omvyskans yowynkneth ha’n omglewans ma a veu dassenys gans eseli an Kuntelles Keltek, aga thema rag keskusulyans hevlena a vydh ‘Yowynkneth’.

Nowodhow da a dheuth dhyworth Rod Lyon neb a dherivas kyn fo res dhe’n BBC gul trohow, y dowlen radyo Taves Kernewek a drig yn salow a-lemmyn.

An Skrifennyades Amyttyansow a dherivas bos ervirans dhe elwel orth 17 person dhe dhos ha bos berdh hevlena, ha’n Konsel a notyas gans plesour an myns a skoodhyans degemerys rag piwasow Holyer an Gof.

Derivas servadow a veu res gans towl dhe arnowythhe kesstrifow an Orsedh hag yw ygor dhe bub huni hag y koodh dhe gommendyansow bos parys erbynn an kuntellyans mis Ebrel. An edhom rag argemynnans gwell a veu dadhlys ynwedh.

Pub skol Kernewek oll a vydh arhwithrys y’n seythennow a dheu dhe dhyski an pyth esens i ow towlenna rag Dydh Peran, hag y feu ynniys war verdh dhe kestava orth aga skol leel dhe gennertha darvosow gonisogethek.

Yma darbarow rag solempnita an Orsedh Ygor dhe Reskammel ewn war an fordh. Hevlena y fydh keskerdh burjesek y’n myttinweyth dres an darvos meur y’n dohajydh Dy’Sadorn Kala Gwynngala. An gwarnyans a hwyrvydh y’n myttinweyth 21ns mis Ebrel.

Kuntelles a Genderwi Gernewek

Berdh dhyworth Amerika Kledh oll eth dhe’n Kuntelles a Genderwi Gernewek diwvledhenyek orth Mineral Point, Wisconsin, mis Est 2011. Poynt uhel an darvos ma a beswar dydh a veu towlennys bos an Solempnita Bardhek, hag a veu ervirys bos synsys war an glesinyow a-dherag an Chi Gundri brav orth amal an dre.

Y fia govynnys orth Bardh Howard Curnow gans Bardh Meur Mick Paynter dhe ledya an solempnita, an pyth a wrussens i skrifa rag an darvos dhe dre yn Kernow. Byttegyns, an Bardh vysytya dhyworth Kernow, neb re beu dhe Mineral Point moy es ugensweyth, a veu lystys avel Krier an Dre ynwedh hag ytho, dhe benn diwettha a spas-tommder, ev a geskerdhas stretow serth (an tu klesys) an dre, yn unn dheklarya an Solempnita hag ynwedh an gwrythyans (meur y sewena), y’n wariva nowyth dasfurvys, a’n ‘The Cry of Tin’. Henna a veu ledys gans Kesvardhes Eleanor Kenitzer - Steren an Cleth – neb a dhros gwer a’y Heur California Grass Valley, dhe wrythya an rannow dyffrans.

Yth esa gwaytyansow owth omsevel ha’n our finel ow nesshe kyns an Solempnita gans an Verdh y’n ayr efan, mes an Arludh Da a’n teva towlow erel. Ev a ygoras an Nevow, hag a-ji dhe unn our, pymp mesva a law a godhas war Mineral Point, yn unn ledya an dus dhe brederi re bia an Mississippi hy honan dihensys.

Diown (kepar ha Hellys teyr seythen diwettha, an Verdh a besyas gans an Solempnita, yn revrons dhe’n towlennans, gwaytyansow an werin ha ma na veu diswaytys Arlodhes deg an Bleujyow, Krystal Blabaum, neb re dhyssa hy areth yn Kernewek yn perfeyth, Solempnita berrhes eth yn-rag (yn stevel dybri an ostel). Heb mar Krystal ‘a ladras an displetyans’ mes lies lev a rassow meur a veu levhes ha’n Kuntelles Kowethas Ertach Amerikanek ma, y’n dre balieth-plomm ma gans hy therrasow a jiow Kernewek, a dheuth dhe benn sewen.

Kernow

Y fydh an Orsedh Kernow synsys hevlena dhe Ryskammel, Dy’Sadorn, Kala Gwynngala. Yn unn geslamma gans an darvos, yma Kessedhek Kovskrifen ha Dyllansow an Orsedh ow kesoberi gans an Kowethasow Kernow Goth a Borthbud, Ryskammel, Lannwedhennek ha Ponswad, dhe askorra kuntellyans a vewskrifow berr a Verdh neb a’s teva neb mell gans an arenebeth a-derdro. Y fydh an lyver ma lonchys dhe benn a vis Est 2012, der an seythen kyns an Orsedh.

Mar omglewewgh y hyllowgh gweres yn py fordh pynag a vo, ena kestavewgh mar pleg orth:

Kowethasow Kernow Goth a Borthbud - (Audrey Aylmer), Ryskammel - (Rod Keat), Lannwedhennek - (John Buckingham), ha Ponswad - (Helen Rawe)

po

Ann Jenkin -
An Gernyk, Fordh an Chapel, Leedstown, Heyl, Kernow
Pel: