Jowan an Cleth - John Bolitho

Yth yu moy es pymp bledhen warn ugans lemmyn aban wrugevy omvetya y’n kensa gans Jowan, ha dhe'n prys-na yth esa ef, del o usys pupprys yn y dermyn yn Kernow, ow cul neppyth abarth an vro a gara ef kemmys.

Mes nyns yu hemma ystory a vewnans Jowan – yma lyes a yl gul an oberen-ma lyesgwyth gwell es del allaf-vy – an re-ma yu ow frederow a-dro dhe’n den del a’n aswonaf dres an bledhynyow-ma.

Pan wrugevy dos erbyn Jowan y’n kensa, ef o esel an bagas donsya ‘Cam Kernewek’, hag a-dhesempes wosa agan bos comendys an yl dh’y gyla, my a alsa gweles bos omma den a wrussa dos ha bos coweth cref dhym dres remenant a’m bewnans. Y vaner o cosel, hegar ha cuf, del vu pupprys dres an 25 bledhen-na re’n aswonnas. Bythqueth ny wrugevy gweles Jowan dhe dhos ha bos dystemprys –fors pynag a ve an treveth – pupprys ef a wrussa omsynsy cosel ha compes, neppyth y coth dhym dysky kens bos re dhewedhes! Mars esa cudyn hag ef Barth Mur, my a wrussa pellgewsel orto tre po dos er y byn yn cuntellyans Consel an Orseth, ha pupprys ef a wrussa goslowes orthyf hag orth ow hudyn, ha wosa tam preder, ry dhym gorthyp a wothfef bos an huny a yllyn-vy trestya hag a wrussa ow servya gwell es henna a ve res dhym gans nebonen aral.

Jowan Bolitho dhe'n Degol Kernewek,
Moonta, S Australya yn 2003

[a-gleth] Avysyans Gorseth Dhe Benennys, Aberfal yn 2002 [a-dhyghow] Jenner Pens-Cansbloth Solempnytys: Jowan Bolitho/ Jowan an Cleth gans Donald Rawe/Scryfer Lanwednoc yn Corflan Sen Uny, Lelant rag an solempnyta ow corra-garlont.

Yn kever y ober abarth Kernow, ple a allaf-vy dalleth? Wel, mars esa neb cowethas, bagas po bush a dus ow cul neppyth dhe scodhya Kernow ha’y fobel, my a yl meughya bos hanow Jowan ena yn mysk an re erel. Ef o scodhyer cref a Kescusulyans Kernow hag a ve sysnsys dywwyth an vledhen dhe Borth Peran, hag yn un sewya hemma ef a dheth ha bos esel an Cowethas Lyen Kernewek, Cowethas Ylow Kernewek ha’n Bagas Selrethek Kernewek. Ef o esel a CoBER, - an Buro Kernewek rag Kescowethyans Europek, hag ef yu recordyes avel an kensa den dhe gewsel Kernewek dhe’n Seneth Eurpoek yn Strasbourg. Ynweth gans y lef cana teg, ef a ganas war an Garrek Los a-dal Marghas Yow an trelyans Kernewek an Antem Europek.

John Bolitho in Australia

Scuesen Jowan Bolitho yn Lowarthow Ballarat Losowek, Austrayla gans gravyans Bob Hawke dyeskynyas Kernewek a vry aral.
Mar nyns yu hemma lowr, ef o esel bewnans a Vebyon Kernow, hag yndan aga baner a dheth ha bos esel Consel an Randyr Kernow Cleth hag esel Consel an Dre Bud/Strasneth. Ha nyns o y ober na y felshyp strothys dhe Gernow. Ef o murgerys y’n Statys Unys ha kens oll Australy, le may whruge vysytya dywwyth ha le mayth ova dewysys avel Tasek an Cowethas Kernewek a Vyctorya.

Nyns yns an re-ma marnas nebes geryow dhe dhysquedhes ass o Jowan cref yn y omglewansow abarth Kernow mes whath jentyl y’n maner a wrussa aga helghya.

Ny allaf-vy leverel marnas, “Mur ras Jowan a buptra a wrussta gul rag Kernow. Re gusky lemmyn yn cres.”

Tewennow (Rod Lyon)

Gorseth Kernow 75ans Lanstefan, 2003. Dyworth an cleth; Barth Mur, Rod Lyon/Tewennow: Cannas Barth Mur, Vanessa Beeman/Gwenenen; An Archdderwydd ha'n Dyllajow Mestres, dyworth Kembrey ha'n Barth Mur dysempys kens, Jowan Bolitho/Jowan an Cleth.


	Dehwel dhe folen 'Dynargh - Newodhow'